滷友記 (華都中心)

营业中

休息中

出街食飯最驚見到萬年油，但係有啲醬料，就係越耐越有味。鹵水汁係一種好特別嘅嘢，用上好多香料同藥材，丁香陳皮甘草，桂皮八角....，每日高溫烹煮，再不停補充材料同肉類，所以味道越濃郁之餘，又唔會變壞。所以揀到一間好嘅鹵水店，越去得多次，啲嘢就會越好味！呢間真係正，而且選擇好多，我決定咩都叫啲！ 🍖叫左一碗蕃茄湯台式牛肉麵湯底，用蕃茄溶係鹵水汁之中，湯嘅質地因此變得杰身，蕃茄味道淡淡帶出，唔會太甜或者太酸，但係就增加左濃厚程度，配合台式麵，扁長既麵身，掛起湯汁，味道鮮濃。叫左四個餸，金錢肚，鹵水豆腐，糖心蛋，同埋甜不辣。鹵水好入味，而且顏色好靚，證明鹵既時間同火候相當準確。特別系甜不辣，雖然浸係湯，但係都仲好酥脆，入面又煙煙靱靱，而且出奇地夾湯底。 🍖因為想單純咁試下個鹵水汁，所以又另外叫左鹵水雞翼同萵荀，雞翼大小適中，同樣非常入味，鹵水汁香甜，輕柔又唔會過咸，喺出色嘅汁膽。萵荀清爽，咬開嘅時候，蔬菜汁液又會為鹵水帶黎一個清新嘅味道。 🍖最後叫左鹽酥雞，因為發現佢地竟然有台式小食。雖然主打鹵水，但係鹽酥雞就一啲都唔差，個皮新鮮炸起非常之脆，肉嫩多汁。一餐飯，食到兩種口味，真係又抵又好味。