喜咖哩 (已結業)

本來好地地，但突發老細放工call開會，放工返到黎都已經8:30，真係冇陰公。好啦求其急急食個晚餐維持生命。呢間外貌有啲日式嘅喜咖哩，入面食嘅嘢原來好港式，而且仲好多滷水系列，價錢貼地，一試無防。滷水脾流心蛋飯，隻脾都幾大隻，淨係份量已經贏左。滷得幾入味，啖啖肉。再加隻半熟嘅流心蛋，係好味嘅。茄湯滷水雞翼滷水蛋米線都ok，個茄湯幾好，唔太假，少少甜甜地咁。滷水雞翼就有四隻，都算係抵啦！可能夜左嚟，米線就比較碎濕濕，但口感係ok嘅，冇話煮到淋曬咁。至於呢度叫得咖哩，我估主打依然係咖哩汁，有機會先試喇，今日真心攰至喊，食乜都冇曬心機。點解係香港打工硬係要一個人做十個人嘅嘢呢？