轉角 (已結業)

話說屯門市中心嗰邊都係連鎖嘅餐廳比較多，其實我個人就比較喜歡幫襯小店嘅，尤其係有小小文青嘅style，飲下咖啡咁樣。而近一兩年就喺華都商場一樓見到一間非常合我心水嘅餐廳，一直都想試下，所以最近就同女朋友去左食brunch。先睇睇menu，價錢上係有啲進取，不過屯門市中心真係缺少同類型嘅餐廳，就算貴少少都好，都好多人幫襯。不過，作為一間咖啡店，套餐只提供黑咖啡，要加奶嘅咖啡就要加十幾蚊，其實我都唔係幾接受得到。卡邦尼意粉。成個意粉偏鹹，汁雖然係幾多，但由於sauce開得比較稀，做唔到嗰種好creamy嘅感覺，衹能夠話係一個好一般嘅卡邦尼意粉。滑蛋鋪燒鰻魚蓋飯。呢個飯都推薦嘅。因為滑蛋煮得恰到好處，加埋啲鰻魚汁，食落都幾juicy。雖然只係半份鰻魚，但鰻魚分量都大份，再加上兩條秋葵當咗沙律，感覺都幾清新。雲尼拿Latte的確有雲呢拿味嘅，但唔知點解同杯咖啡好似唔係太夾，我會建議試其他味道。最後，這間餐廳嘅侍應真係有待改善，落單同催單嗰時佢哋都有神冇氣，冇乜表情，希望呢班後生仔上左手之後會做得好啲。