Wingman (已結業)

朋友話不如去食雞翼下午茶，原本我以為去食茶記，原來係去一間以雞翼為主題嘅餐廳食，令到我都好期待。去到餐廳坐低睇個Menu，估唔到有咁多款雞翼揀，餐廳仲要好貼心咁分係乾身定係濕身，而且仲有雞翼放題揀。餐廳嘅裝修都好有特色🤣有好多得意打卡位我哋今日叫咗四款濕身雞翼食。首先第一款係Wingman水牛城醬雞翼。依款雞翼水牛城醬味道好濃烈，酸酸辣辣。加埋雞翼面上嘅芝士粉食，更加惹味！第二款係日本蜂蜜芥辣雞翼，係我都幾鍾意嘅一款雞翼。雞翼甜甜地，味道比較清新。芥末可以自由添加。第三款係黑芝麻海鮮蜂蜜雞翼。依款雞翼，味道係四款裡面最濃味嘅，每隻雞翼都塗滿晒海鮮醬。最後一款係泰式甜辣醬雞翼。雞翼上面落咗蒜蓉粒，加上甜辣醬酸酸甜甜，食落去更加香口，我都好鍾意個味道。