泰廚房子 (德福廣場1期)

营业中

休息中

星期六約咗朋友去九龍灣行街同睇戲，當然要搵地方食過飯。德福有好多新食府，我揀咗間泰國菜館，雖然地方小小，不過我哋非常好彩，去到還有一張枱。餐廳出餐好快，但我哋見到好快已經要等位。先呢一個鮮蝦柚子沙律，柚子多汁鮮甜，鮮蝦又爽口彈牙配上少少辣嘅泰國風味，真係特別醒胃。經典肉碎生菜包好食到離曬譜。碎肉有肉汁配埋九層塔再俾啲新鮮翠綠嘅生菜包住，熱辣辣咁食落口，好滋味。炸蝦餅又係一樣傑出之作。去到泰國都唔係度度蝦餅好食。佢唔單止爽口彈牙，食落中帶有肉汁。要小心食，嘴都會熱親燒傷。芒果沙冰雖然等得耐咗少少，但係佢用咗泰國嘅水仙芒，飲落香味濃郁，特別透心涼。 飲埋龍眼冰唔好以為普通嘢。龍眼嘅香味充滿曬口腔，上面再放兩粒龍眼肉，又有視覺又有口感。今次食咗幾款嘢都非常好，下次要先打電話留位，約多啲朋友再嚟，可以食多幾款嘢。