曼谷泰菜 (珠璣大廈) (已結業)

喺門口見到晚市星期一至五都有不同類型菜式做緊優惠，包括：粉絲大蝦煲、泰式鱸魚、墨魚筒等等，咁啱星期五做緊粉絲大蝦煲$128優惠就入咗去試吓！入去見到某啲店員本身應該都係泰國人，裝修唔算太華麗，但係金光閃閃都幾有泰式風情。打開個Menu見到有好多選擇，包括有主菜、單點美食、套餐、泰式飲品。當日仲做緊椰青$35個，$50兩個嘅優惠，不過本人唔太好呢家野，就冇order。等待上菜嘅過程有啲耐，但係值得嘅！先來一疊雞油香飯，大家都未開餐住，等埋啲主菜泰式豬頸肉，非常好味份量都幾多，配上炸蒜粒入口非常之香，送飯一流！粉絲大蝦煲重量級登場，同朋友硬係食到一啲香料味道，搞清楚原來係落足八角去整，粉絲入味滑捋捋大蝦有兩隻，大廚就將佢各切開兩邊，剝蝦好方便，用叉一起就食到，雖然肉質感覺唔算好鮮嫩，但可能係泰式煮法，都ok嘅。加埋碟簡單又不失當地風味嘅泰式通菜，Perfect啊不過由於價錢唔係平，一碟菜可能都講緊大約$70，建議兩個人食嘅話可以叫個大份量嘅粉絲煲加1至2個小菜，再額外叫碗$15至$18一碟嘅淨飯，咁就一定飽。