麵屋武藏 武骨 (The LOHAS康城) (已結業)

今日去康城探朋友順便行下個新商場，商場好多食店，路過見到一間麵屋武藏，記得以前喺東港城都有一間食過一次覺得普普通通，不過間店已經無左，同朋友都想食拉麵就入去試下，我同朋友分別點左拉麵同沾麵，我自己食蕃茄叉燒拉麵，湯頭比以前香濃好多，叉燒再唔係以前用嘅鹵水叉燒而係改左用低溫煮法，肉味濃而且肉質軟滑，好食，再試朋友點嘅沾麵湯，夠稠身好重豬骨味，唔錯，跟住又試左一淡另一朋友點嘅黑蒜油拉麵湯，豬骨味好濃而且帶微微稠身剛好夠拉麵掛湯，小食方面個人比較喜歡魷魚紫菜天婦羅，將紫菜夾住魷魚炸，師傅炸得好鬆脆好香口，魷魚肉質爽脆好好食，另一個係九條葱豬肉串，厚切豬腩肉，肥瘦平均，肉質鬆軟，汁醬調校得唔錯，夾埋葱絲一齊更加香，除左食物好食外，樓面同事服務亦好有禮貌，由帶位到埋單感覺都好好，講解餐牌食物時候好細心，總結食物同服務係進步左。