潮庭 (新都會廣場)

营业中

休息中

潮庭係美心集團旗下餐廳，大概會知道水準。環境設計舒適，服務員亦非常細心妥善，安排好好嘅座位，距離適中唔會太擠迫。餐廳有機械人負責收集碗碟，非常有效率、乾淨、整齊，其他職員分工清晰，一定有人照顧客人需要。講番菜式，嚟得食潮洲嘢，我就一定食胡椒豬肚湯及蠔仔肉碎粥，兩個餸都係必食，仲可試到餐廳水準。蠔仔肉碎粥，味道合格，落埋胡椒粉好夠味，但差少少係佢唔夠熱。胡椒豬肚湯，冇胡椒味及咸菜味，只有豬肚滾湯味咁。同經理講聲，佢解釋話係遷就客人口味，唔好咁辣。但你改變咗胡椒豬肚，就唔係胡椒豬肚湯喇，所以其實有啲牽強。但經理都好好人，取消咗個湯。蒜蓉炒豆苗，好食。菜甫肉碎炒蛋，送飯一流。但有啲甜味，可能係菜甫味道，但都好食。鮮枝竹蕃茄煮班球，味道好，見到好多人都有點呢個餸。