川之源

营业中

休息中

最近俾🐢🍯投訴好耐冇見，佢今晚仲特登出嚟接我收工，於是我哋就喺返港島區搵嘢食。因為佢都係好鍾意食辣野，所以我哋今晚都係食川菜。我哋揀咗個酸菜桂花魚，佢唔同出邊成碗見到剩係得啲花椒或者辣椒，就咁睇落俾人嘅感覺唔會好辣。啲魚起晒骨，一片片啖啖肉，都好嫩滑。通常我食酸菜魚第一樣試嘅會係佢啖湯，而佢呢個湯一飲完之後都令我睩大對眼，因為佢個湯底真係有魚嘅鮮甜味，唔會得返啲酸味或者係辣味。而最令我驚喜嘅係，通常一般都會放薯粉，但呢間放嘅係我最愛嘅粉絲。另外我哋揀咗個辣子一口牛，佢啲牛柳粒係會輕輕炸過，先至再撈落去辣椒度。而佢啲炸粉絕對唔會好厚，但係有比到你香脆嘅口感。然後我見到佢呢度有我最喜歡食嘅炸饅頭，所以都叫咗你試吓。一咬開又係令我覺得好驚喜，雖然佢係用大個嘅饅頭，但係炸完都唔會成舊饅頭都係油，反而係熱辣辣嘅時候食會有好鬆軟嘅感覺。另外嗌左個清炒萵筍絲，可能因為食咗前面好多濃味嘅嘢，相比之下呢個萵筍絲就比較清淡。最後佢仲會有一個俾你解辣嘅冰粉做甜品，佢個甜品係用桂花糖做底，冰粉已經切到一粒粒，每一啖都食到透心涼嘅感覺。兩個人食到好飽，呢個價錢喺港島區來講都算抵食，因為佢每一樣野嘅份量都好多。