今晚試咗梅鐵板2人前套餐，整個體驗非常滿意。二人餐前菜主食連甜品有8款食物，配埋Free flow清酒食飽飲醉兩個人都只係$688（另+1），個人覺得超抵食！
日式裝潢同寬闊設計非常舒適，坐低就拎清酒樽出Sake bar 拎酒。首先入目嘅係林林總總嘅日本清酒，凍熱皆具加埋應該有百幾款，非常壯觀。另一驚喜就係Sake bar 隔離嘅街機，可以2人連線打街霸，如果同另一半或者朋友Chill 住打機都幾開心。
食物方面，上菜節奏控制得好，食物一樣接一樣，先到嘅係豐洲直送嘅刺身三點盛，新鮮，刺身夠新鮮就好食！
鐵板燒比目魚，皮脆肉嫩，坐爐邊枱仲可以望住師傅燒，重溫一下置身日本嘅體驗。
串燒拼盤擺盤清緻，雞牛豬加蘆筍同蘑菇，肉嘅火候控制得唔錯，保持到肉汁唔會太老，蘆筍我最至，可惜無得encore。
中間上咗碟北海道松葉蟹棒配日本小茄子，蟹肉鮮甜而且茄子清爽，可以清一清味蕾食主菜。
安格斯牛肉薄燒驚喜之作，薄燒肉質超嫩，中間包炸蒜同香蔥，好惹味。
主食可以烏冬炒飯2選1，感覺上炒飯可以帶嚟更多驚喜，炒飯粒粒分明仲夾雜住蝦乾同蔥嘅香味，屬於高水準炒飯，諗返都流口水。
呢一餐絕對抵食之後，值得再次光臨。
