麻布茶房 (已結業)

雖然話將軍澳得大商場，冇咩特色小店，但是識得搵好嘢食，其實四周都係寶，今日嚟到Popcorn 嘅pop food，就食咗個高質日式午餐。近排開始有啲秋涼，但係正午時間係街行到成身汗，點都想食返啲清爽嘅嘢食，就叫咗個溫泉蛋彩色冷蕎麥面。好大碟，起碼有兩個飯碗份量嘅蕎麥面，上面鋪滿吞拿魚粒、青瓜粒、玉子、香菇粒、魚子、壽司姜，最重要係中間有得流心溫泉蛋。魚籽咬落幾鮮甜，食得真係幾新鮮，配合蕎麥面嘅味增湯底，成件事好夾，將魚籽嘅鮮味襯托出嚟。溫泉蛋整得好滑，用嘅蛋都幾高質，幾有蛋香。香菇絲估唔到咁有香菇味道，食得出特別醃制過，有輕微蠔油味。蕎麥面可能因為過咗冷河，特別煙韌有口感，食落感覺清爽。配菜係小豌豆同紅蘿蔔粒，食得出加左少少梅子醬，酸酸甜甜幾開胃。抹茶雪糕溶得幾快，抹茶🍵醬都冇咩抹茶味，有啲失望，不過整體來講90幾蚊食咗個咁高質嘅午餐都算係幾滿意。