合益泰小食

营业中

休息中

想試既深水埗食肆實在太多，係一年前已經想一次過去食晒佢，而家終於有機會去「深水歷險」一番! 第一站係地鐵站一出既合益泰，三個人所以叫左個大既腸粉($10)同一個豬皮蘿蔔魚蛋($19)。腸粉雖然係大，但原來都唔係特別大份，兩個人都好容易食得晒。佢本身已經落左麻醬（仲要好多下），畀你自己任落豉油、甜醬同辣醬。無情地咁擠完甜醬同豉油後，三個人就唔客氣啦。正如好多人講，腸粉滑不過其實都好普通，係一般的腸粉。好食就在於佢既「奇妙醬」。麻醬又多又非常的香，混埋D其他醬到整個感覺都好好。本身諗住淨係食腸粉，但見有三個人，就叫多左個豬皮蘿蔔魚蛋。成$19咁多都有D唔抵，食完之後就更加覺得唔抵。魚蛋要辣的，但其實咖哩味唔香，魚蛋都唔彈牙。蘿蔔幾甜，普普通通，而豬皮都唔錯。下次都係淨係食腸粉得喇。埋單既時候，出面落狗屎咁。即使差唔多坐滿晒人，收錢既姐姐都叫我地坐多一陣先走，搞到我地都突一突。雖然最後都係即刻走，但都好欣賞佢親切既服務。