茶屋町 (長沙灣道) (已結業)

今日要幫公司去深水埗買零件， 買完零件周圍睇下附近有咩食， 附近有間小店做日式料理 ，見到啲熱食都幾啱食， 又見到有綠茶雪糕， 所以入去試下。芝士唐揚雞肉丼跟餐有碟小菜， 有蛋，紫薯，海帶， 味道正常， 紫薯幾甜， 個主菜嘅份量都幾足， 有成五六件炸雞，上面舖咗沙律醬和芝士醬， 仲有適量嘅椰菜絲舖底， 撈勻嚟食， 椰菜和飯中和咗炸雞嘅肥膩感， 味道方面都唔錯， 炸雞唔會太乾， 裏面仲有肉汁。燒豚肉丼豚肉係用五花腩嚟做成， 煎得幾香口， 會燒汁鹹鹹地甜甜地幾好味， 肉嘅份量都好多， 呢度飯都係用珍珠米來做。茶屋宇治金時其實食完個飯都飽飽地， 不過見到個甜品幾靚又忍唔住要嚟試下， 甜品入面有綠茶軟雪糕， 紫薯， 紅豆，啫喱，威化碎等， 綠茶軟雪糕個綠茶味好濃， 幾軟熟， 其他配料都正常， 建議將幾款配料一起食， 有多種味道和口感。