大鍋口海鮮火鍋店 (已結業)

由於今晚喺旺角附近做嘢做得比較夜先做完，有好多食店都收咗工，所以我們突然諗起已經有一段時間無去喺瓊華中心嘅「大鍋口海鮮火鍋店」係營業到凌晨，所以我們就去咗食宵夜火鍋！同以前一樣，一開始店員就會攞咗個調味醬料盤畀我們自助選擇要咩調味醬料，可能係人流非常多嘅關係，所以啲辣椒絲、香蔥同蒜蓉都係好新鮮，唔會變乾晒，好似擺放咗好耐咁，而且處理得好乾淨衛生！至於湯底方面今次我們都係揀咗我們最愛嘅椰子滑鷄湯底，因椰子嘅味道相當清甜芳香，唔會太過濃郁而掩蓋咗所有材料原有嘅鮮味，而且喺滾起嗰陣有陣陣椰子嘅香氣撲鼻，感覺好滋潤，真係好正呀！手切肥牛嘅肉質好軟滑，牛肉味都幾濃郁，而且色澤好紅潤！生猛海蝦真係好新鮮大隻，而且肉質相當爽甜彈牙！白鱔片嘅質感非常爽滑彈牙，但就略嫌切得比較薄身！至於其他火鍋材料同蔬菜都清洗得好乾淨衛生，而且相當新鮮！