泰妹餐廳 (已結業)

熱辣辣的夏天，行一陣街已一身汗，即刻同朋友去食個晏過下冷河先。黎左泰妹食，見佢午餐唔貴又幾多款揀，加上啲位幾濶落，好坐都好緊要㗎。午餐的餐飲冷熱同價，天氣咁熱梗係要冷飲啦，要左泰式凍奶茶同青檸疏打，奶茶是加煉奶的，甜甜地幾啱口味，青檸疏打夠冰涼又青新，正。海南雞拼泰式鹹肉飯（$68）因為唔知咩係泰式鹹肉，就叫呢款雙拼試試，賣相幾靚吖。雞件已去骨，好滑又唔肥膩，點埋醬汁食一流，個人最鍾意個泰式辣醬，酸酸辣辣好開胃。鹹肉有啲似香港嘅燒肉，但個皮無咁脆，半肥瘦帶鹹香，都幾好味噃。冬蔭海鮮湯金邊粉（$68）朋友叫左湯粉，個湯上黎個陣都幾香喎，海鮮就有青口，蝦，魷魚等，都幾足料。金邊粉吸飽湯好味，份量算大碗嘅。湯底酸酸地帶微辣，仲有濃濃的香草味，唔錯啦。午餐唔使加一，食物ok，份量足，淨係涼下冷氣飲杯野都抵啦。