緣味小聚 (LADDER Dundas) (已結業)

踏入24節氣嘅小雪，理應天氣漸涼，但最近嘅溫度還是反反覆覆，但冇阻食蒸鍋嘅興致。 最近食蒸鍋嘅餐廳都越嚟越多，今次就嚟到旺角試下緣味小聚， 喺旺角彌敦道Ladder Dundas 9樓海鮮蒸鍋有三個套餐選擇，豐儉由人。今次試下$268/位 星級大鮑魚海鮮蒸氣鍋套餐 有八款蒸海鮮＋ 豐盛八寶蒸飯，可加$20 非酒精飲品任飲，開鍋計任食2.5小時。首先上蟲草雞腳燉湯每位一客， 蟲草花幾香，夠清甜。之後再逐款海鮮送上，侍應會幫忙處理。海鮮包括鮑魚、帶子、花甲、龍躉、海蝦及其他貝殼類， 每款海鮮都非常新鮮及鮮甜， 最正係鮑魚十分彈牙，食完海鮮後仲有無限量牛頸脊、蔬菜、馬拉糕等等任食。最後就係八寶飯啦， 有二十多款配料可自選八款，我哋揀咗翠玉瓜、臘腸、南瓜、雞件、蓮藕、芋頭、 淮山、牛舌。 多款材料混合嚟食，非常滋味。 最後食埋個黑糖桂花冰粉，好飽非常滿足。