千賀水產 (已結業)

千賀水產前幾晚同朋友直出元朗，為左食朋友講到好吸引嘅磯燒海鮮放題！講到咁吸引，究竟有咩食呢！每檯都會有個預定嘅海鮮set, 有生蠔、鮑魚、鮭花蚌、扇貝同蝦，仲有仲有甲羅燒！最吸引當然係甲羅燒同鮑魚啦！值得一提係個鮑魚清洗得好乾淨，連鮑魚尾舊腸都清乾淨嘅！食完D無得encore嘅海鮮、食返有得任叫嘅海鮮。青口同蜆仔好清甜，無沙，同埋無死蜆。食完新鮮野，食返一般放題食物！燒雞扒味道唔錯，個皮燒到好香，好juicy，同埋切到細細件，唔會食滯！另外，有得叫我最鍾意食嘅印度薄餅，上碟好熱，咖哩汁好熱好香帶有少少辣。必叫雞軟骨，剛剛炸起，無油溢味，熱辣辣，灑少少七味粉。如果有少少蛋黃醬點下會更加好味。放題梗係到尾聲叫榴連炸彈，香噴噴夠臭嘛！另外出面可以飲品任攞，重點係有corona同apple cider攞，攞多兩罐都回本啦！價錢雖然有d貴，但有得有海鮮燒，都算唔錯！