海魂燒 (已結業)

要食海鮮唔一定要去到西貢屯門咁遠嘅，近近地天后已經有出色煮法嘅海鮮食。芒果牛油沙律配搭好夾，芒果夠甜，加上個醬個味調得好清新，啲牛油果就溶左啲醬入面，層次更豐富。特式炸拼盤，有雞軟骨、單骨雞翼同天婦羅蝦，三樣都唔錯，尤其雞軟骨配沙律醬食到停唔到口。金菇牛肉卷，燒得唔乾，好飽滿多汁。鹽燒荀殻皇，一上檯已經起哂皮，魚肉新鮮，一定要點埋個泰式酸甜汁，夾到爆。另外散叫左個鐵板日本和牛燒肉，有得自己燒都幾好玩，用牛油燒左啲蔬菜先，啲和牛夠嫩，肉味濃郁。重頭戲係燒原隻波士頓配芝士火炙海膽，十級正呀，唔單止多蟹膏，啲蟹籽同海膽啖啖鮮味，龍蝦肉彈牙香口。最後黎個清淡嘅野菜湯烏冬，清清腸胃幾好。仲有個菠蘿汁都推介，平衡返海鮮燒肉嘅油膩感。