地點：銅鑼灣Fashion Walk食街
菜式：主打海鮮同牛扒
餐牌：除左海鮮同牛扒，餐牌都有肉類，麵包，湯，小吃，沙律，漢堡，意粉，飯，配菜，甜品。
泰式羽衣甘藍燒牛肉沙律 $135 另加一
面頭有六條燒牛肉，燒牛肉係暖暖地，都算嫩口，入面未熟哂，味道甜甜地。下面有好多沙律雜菜，羽衣甘藍，洋蔥絲，青瓜，甜椒，再加上芫荽同花生碎，口感豐富，醬汁酸酸辣辣，好開胃。
香蒜橄欖油浸墨魚片 $105 另加一
呢道香蒜橄欖油浸墨魚片小食好特別，墨魚片份量唔少，切得薄片，食落帶少少爽口，浸落唔少橄欖油，面頭好多蒜片，炸得好脆口，好香口，仲有少少炸昆布。
忌廉蘑菇濃湯 $90 另加一
好大碗，明顯食到菇粒，口感滑溜帶菇香，面頭灑上香草同少少麵包粒，伴有兩片長蒜蓉包。
法芥醬忌廉燴黃油春雞配烤中東烤餅 $280 另加一
法芥醬忌廉燴黃油春雞配烤中東烤餅用熱金屬盤上枱，包寶熱辣辣。小春雞一開4件，兩脾加兩翼連身，份量唔會太多，伴有紅蘿蔔四件同唔少菇仔菇粒。個法芥醬忌廉汁又滑又香，唔重口味，配4片燶面中東烤餅一流。烤中東烤餅脆口，點芥醬忌廉汁好味道。
今餐試左沙律，湯，小吃同雞，下次希望可以試試其他菜式。
