戀上台式料理 (已結業)

平時係將軍澳海旁散步嘅時候成日都會比旁邊嘅餐廳吸引到，今次就約埋朋友去食呢間戀上台式料理。餐廳係半開放式嘅裝修，有唔少戶外嘅座位，天氣好嘅時候望住個海食飯都幾chill. ✨水蜜桃生炒骨（$88）平時食晚飯都會想叫啲酸酸甜甜嘅小菜開下胃，今次就揀左呢道水蜜桃生炒骨。生炒骨新鮮炸起，食落口感外脆內軟，酸甜度岩岩好。✨特色手工餃麵（$68）朋友話唔太想食飯，我地就叫左碗麵share. 麵款分別可以選擇刀削麵/陽春麵，我地就揀左幼身嘅陽春麵，我幾鍾意佢地嘅牛肉湯，飲落鮮甜得黎又唔會太咸。✨戀戀蚵仔煎（$68）佢地嘅蚵仔煎賣相相當唔錯，入面加滿左香蔥都幾香口，但蚵仔嘅分量就略嫌不足，再多啲嘅話應該會更好味。✨台式烤香腸（$58）台灣香腸分別有普通嘅蜜糖味同埋墨汁味，兩款都好好食！配埋生蒜片食味道更佳。✨薄荷窩夫配草莓三重奏（$68）最後我地仲叫左款甜品，呢個窩夫其實我就唔太食到有薄荷味，口感方面同平時食開嘅窩夫有啲唔同，有少少食壓平左嘅油炸鬼，再配埋奶油同雪糕，味道都唔錯。