GāGǐNāng 飯館 (已結業)

尖沙咀向來係各式美食匯聚之處，要數多選擇而又可以食埋景觀，鄰近碼頭坐擁維港海景嘅LCX實為頭號心水。附近有多棟商廈、寫字樓，即使疫情底下中午時間仍食客不少。入座先送上前菜，咸酸菜鹹中帶酸、爽脆清新，烤麩筍片醬油香濃、稔軟多汁，兩者一清一濃，惹味開胃。揀選咗清淡而甘香嘅菊花，毫不濃澀嘅青茶帶淡淡青草香，解渴同時消滯。雖然係潮州菜館，點心種類同一般酒樓無大分別。價格偏高，但以LCX地段以言尚算合理，茶芥盛惠$25一位。蝦餃燒賣絕不可少。燒賣大粒飽滿，豬肉混和粒粒鮮蝦，口感結實，中意有咬口嘅人可以一試。白兔造型蝦餃，小朋友一定中意😍餃皮偏厚身煙韌，相對無咁易散，蝦肉鮮美爽口，配上菜館提供嘅XO醬，增添咗香辣鮮味進一步提升。初嘗欖菜餃，粉皮質感濕潤軟糯，輕薄易破，裹有菇絲欖菜內餡，鹹鹹香香，有啲似茶粿嘅風味。上海人早餐一定要配包點，一見有大包即刻剔紙🤪雞包有拳頭大小，包身熱呼呼、好鬆軟，餡料豐富，有雞件、豬肉、火腿塊、菇片，飽足感十足。加入潮州風味嘅鵝片撈粗。粗麵比一般車仔麵嘅幼身，以滷水汁拌勻調味，鹹甜適中，五香味突出，好香；鵝片切絲，份量頗多，佔三分一比例，每啖麵都食到有肉👍🏻👍🏻