海安咖啡室 (已結業)

當新派嘅、刻意復古嘅冰室開到成行成市，我依舊鍾情於真正老舊、而且充滿人情味嘅茶餐廳。同朋友講咗好耐，終於趁佢放lunch捉到佢去食海安，呢間茶記屹立咗喺上環六十年啦。聽聞海安嘅叉燒一早就會買曬，於是我地屁股都未坐落張凳就已經問仲有無叉燒，咁又竟然俾我地食到。有如時光到流五十年嘅裝潢、友善有禮嘅伙計，雖然食物唔算有驚喜，但總括而言食到地道嘅香港味，所以都值得回頭嘅！叉燒薑蔥香油撈麵餐 $48⠀厚切叉燒帶少少蜜糖嘅焦香，不過比較瘦，所以食落比較乾，無波記咁好食。好彩撈麵麵底夠乾身，麵質彈牙，蔥香撲鼻，份量亦頗大。聽講雞翼都好食，見到對面食緊，好吸引，一於同個蔥多士一齊留翻下次試。