My Ahjussi (已結業)

大角咀多好嘢食係人都知，今日特登約咗朋友嚟發掘吓，揀咗呢間裝修幾精緻嘅韓式Cafe。🪑裝修有少少文青風打咭位，天花鋪咗啲花花，枱同枱距離都闊，唔會聽到隔離講嘢，非常適合放工同朋友嚟傾偈飲嘢。🐮韓式牛肉飯卷 $55呢個幾抵食，一碟好多嚿，一開始驚會好飽，但飯卷除咗飯同牛肉，仲有少少清新嘅腌菜中和番，配搭有心思。🥗牛油果炸豆腐沙律 $78份量比我想像中大，我同朋友夾咗幾轉先食曬。牛油果夠滑夠熟，炸豆腐外脆內軟，菜都新鮮，加埋麻醬真係無得輸。🦀軟殼蟹忌廉汁意粉 $98軟殼蟹一開四都仲啖啖肉，香脆唔腥。意粉比較乾身，食落好有奶油香，仲有少少菇粒豐富口感。🧉凍義式特濃朱古力 $45呢杯比我想像中好喎，特濃真係有特濃，好有朱古力味，又唔太甜，雖然唔算平但收貨。呢間小店仲有支持地區服務，值得一讚👍總括嚟講幾滿意，份量味道都物有所值。