尚鮮日式燒肉漁市場 (已易手) 新餐厅

一坐底後店員會教你用ipad落單，好過用紙又方便又環保，之後就送上浜燒海鮮拼盤，呢個係2人份量，有鮮鮑魚、扇貝、貴妃蚌、大蝦、連甲羅燒都有！鮑魚新鮮到燒嗰陣仲識郁，而甲羅燒有蟹膏、鵪鶉蛋、蟹籽、香蔥同蟹柳，燒之前先撈匀，蟹膏味道鮮甜濃郁，燒完更加香氣十足。燒肉方面款式都唔少，牛豬雞肉樣樣都齊，蔬菜海鮮都有，部分已經有醬汁調好味，部分冇調味既可以自己用枱上既調味料，有鹽、黑椒、七味粉、燒肉汁，我就推介一口牛同牛舌。雖然呢到係食燒烤為主，但刺身壽司既款式都好多，質素同平時日式放題既絕對有得比，刺身就有齊我最鍾意既三文魚、帶子同甜蝦之外，仲有鯛魚、吞拿魚、榮螺、北寄貝，食落新鮮肥美，唔會有腥味。叫左花之戀、鰻魚、炸蝦卷，連火炙壽司都有，燒過既三文魚特別香，不過建議夠飯可以整細d，咁就可以留返個肚食到更多款啦。最後除左出面有甜品雪糕任食之外，每人仲會送一杯movenpick雪糕，食完真係夠哂滿足。