蝦蝦燒 (已結業)

我同朋友都好鍾意食海鮮，特登揀咗嚟呢度任食3小時流水蝦、海鮮、燒肉放題。最過癮係可以自己夾吓即燒，夠晒新鮮。我哋一開始梗係專攻流水蝦啦，羅氏蝦勁生猛，一夾起要即刻放落冰水凍暈佢，然之後即燒勁香，啲蝦好爽，個頭都好多膏。然之後梗係出去小海鮮檔嗰度揀海鮮，我哋拎咗扇貝、仲有一隻好大隻嘅唔知咩貝類、生蠔、鮑魚、黃沙大蜆、魷魚同埋黃花魚。我哋自製左蒜蓉粉絲燒扇貝，好鮮味，鮑魚都笑得好柔軟一啲都唔會朝橡筋。黃沙大蜆超鮮甜冇沙。黃花魚我哋都係簡單喺上面灑咗一啲粗鹽，然之後落咗一啲蒜蓉同埋蔥花，燒得好香，黃花魚皮脆肉嫩，好新鮮。我哋食完海鮮其實都飽咗大半，但係都試咗幾款肉類，燒雞翼、牛仔骨同埋羊架。每款都幾好食，我就最鍾意食燒雞翼，燒到皮脆脆裏面充滿肉汁。其實出邊雪櫃仲有好多款串燒、牛肉、丸類等等，但係我哋已經冇quota食。蔬菜方面我哋因為太飽，所以冇食到日本少甜薯、南瓜嗰啲，淨係拎咗菠蘿返嚟燒，酸酸甜甜可以解膩。最後我哋食埋個阿波羅雪糕批就飽到上心口。