靚煲皇 (已結業)

天氣時冷時熱，都唔知想點，天文台話呢幾日會凍，所以趁香港仲有冬天就同女人黎洽下洽下，講真丫，雖然依家好多餐廳夏天都可以開住冷氣打邊爐，但唔知係咪我老餅，始終覺得打邊爐應該係要冬天冰住咁打先過引。雖然訂左位，不過都要等左一陣，見到都好旺場，可能凍左生意多掛。一坐座即刻叫左個冬瓜瑤柱湯底，再慢慢揀野食。店員推介叫左個手切肥牛，上到枱見到的確油脂分佈係比平時打邊爐食既肥牛片來得均勻，牛肉味亦甚濃郁，不過女人話怕食得牛多會燥，食左小小就主力食菜，最後碟牛係我同朋友食多。打邊爐梗係食肉啦，食菜不如返屋企食。當時呢句我只敢心入面講。手打四寶丸有墨丸、鯪魚球、蝦丸同牛丸各2粒，個人鐘意墨丸，打得夠結實彈牙。美國桶蠔，得四隻，少左d,話晒收168，好彩每隻都幾大，好肥美，如果唔係就唔抵。另外仲叫左碟脆鯇片同脆骨腩同價，早知叫骨腩冇咁多骨又肥d，不過魚鮮味好岀。疏菜我就冇乜點食，女人食多，不過睇落都新鮮。不得不提佢個湯底，好鮮味，見到個底真係好多瑤柱仲要係大粒!阿媽煲湯都唔捨得用咁大粒瑤柱，我地飲左好幾碗，係咁叫侍應加湯。