阿叔泰麵 (西菁街) (已結業)

泰式奶茶（$24 ）用咗手標茶同煉奶沖，標準泰式味道，怕甜嘅朋友不妨等啲冰溶少少溝淡啲再飲，三色拼盤雞翼（ $58 ）三種雞翼各有特色，酸辣凍雞翼用上泰式鳳爪做法，頗為開胃，而雞翼夠晒厚肉加上凍食嘅關係，口感爽脆，魚露香茅雞翼香料味十足，惹味之選，紅咖喱雞翼辣度足夠，醃得亦入味，食落過癮。牛肉船麵（ $60 ）亦係佢哋嘅主打，湯底十分足料，清甜得來帶少少藥材味，麵底揀咗我最愛嘅金邊粉，貪佢索到湯之餘亦保持到煙韌嘅口感，牛肋條燜得入味，厚肉得黎唔會好柴，而邪惡嘅炸豬皮更加係畫龍點睛。