板上 (D2 Place) (已結業)

真係寫個服字比呢間野。星期六下午茶時間我地就去d2place搵下野食，咁我一直食過幾間d2place既餐廳都覺得幾唔錯。咁見呢間板上都有幾多分店裝修又幾靚就幫襯下。咁我就叫左個柚子醬油燒極黑豚珍珠飯，加杯紅豆奶茶。首先飲淡紅豆奶茶，茶底係普通茶記料，係一間咩都有得食既餐廳都唔要求咁多，但都合格啦。配菜係粟米車厘茄，同埋木耳，但佢唔係普通的木耳，係加左泰式辣醬既木耳，我夠膽講泰式辣醬同木耳之間既關係，就好似我同林嘉欣咁，一啲關係都冇！！！！完全唔夾仲要冇味。燒極黑豚都食到人好消極，柚子味唔多，醬油味唔多，都算，塊肉冇味道既，又唔似燒得好勁，但又韌到我用刀鋸極都唔爛，我差d 要call消防幫手。我食到最後開始懷疑呢間野係養生餐廳，唔為食物加調味，主打白烚食物。簡單d講，成餐最正既就係車厘茄。