ASOK THAI CAKE

营业中

休息中

今日去咗中環嘅Asok Thai Cake試佢哋嘅泰式蛋糕真係驚喜！我一去到就見到佢哋雪櫃入面嘅蛋糕造型精緻，特別係啲生果嘅造型好逼真。由於我要買個生日蛋糕，所以揀咗泰國青檸士多啤梨慕絲蛋糕，4吋size夠4人食用。呢個蛋糕真係睇得又食得，最適合打卡留念。我真係估唔到粉紅色嘅士多啤梨造型入面都有咁多餡，佢地用咗士多啤梨慕絲同果泥組成。蛋糕上面鋪滿花花草草同埋泥土，而呢個泥土就係朱古力脆脆，令到口感更加豐富。蛋糕嘅外圍用薄薄嘅白朱古力圍住，入面有好多層layers，每一口都可以食到士多啤梨紅紅桑子果泥，薄片嘅海綿蛋糕同埋厚身嘅士多啤梨慕絲。加埋泰國青檸嘅味道，同甜甜嘅士多啤梨一齊，成個蛋糕嘅味道配合得好好，酸酸甜甜，真係開胃又解膩。除咗味道之外，蛋糕嘅質地亦都好出色。海綿蛋糕軟綿綿，慕絲層口感滑順，而士多啤梨果泥嘅質感就好似新鮮果肉咁，好滋味。整體嚟講，呢個泰式蛋糕真係好好食，特別適合當作生日蛋糕或者係朋友聚會嘅甜品。