影片
更多
2013-09-26
235 浏览
麵包班同學仔兼老友Ivan兄，啱啱去完越南玩，順道買咗包越南咖啡俾小弟做手信，仲話搵日一齊下午茶試吓自家沖嘅越南咖啡，既然有越式咖啡，咁就不如搵啲法式甜點襯一襯喇 ！時近中秋，又咁啱，兩大老外法式甜點店都借中秋搶灘，不約而同都有推出「月餅」甜點，咁就不如搵埋幾個朋友嚟個「法越悠然甜點薈」，法式月餅配越式咖啡，搞搞心思自家製「高茶」，悠悠然嘆番下 。法式月餅，除咗Paul Lafayet之外，仲有agnès b. DÉLICES嘅「月餅」，後者要另文（下篇）再分享，先跟大家分享喺Paul Lafayet嘅馬卡龍「月餅」。佢哋出嘅馬卡龍及法式甜品晌質素上無庸置疑，單睇餅櫃所擺放一列又一列嘅甜品，琳瑯滿目，目不暇給，尤其馬卡龍，眾所周知，口味頗多，出齊嘅話有近20款之多，就算此刻所見都有成16款，每粒零售$18，粒粒華麗吸引，令人揀起嚟心猿意馬 。喜獲贈送喺新推出嘅「Moon Festival Macaron Gift Box」（$220），七粒星星伴一個月亮，好有中秋傳統嘅七星伴月概念 ，啡色長型禮盒，透明圓形小窗，清晰可見嘅「七星伴月」，甚有種漆黑宇宙中閃亮星體嘅感覺 ；再者禮
佢哋出嘅馬卡龍及法式甜品晌質素上無庸置疑，單睇餅櫃所擺放一列又一列嘅甜品，琳瑯滿目，目不暇給，尤其馬卡龍，眾所周知，口味頗多，出齊嘅話有近20款之多，就算此刻所見都有成16款，每粒零售$18，粒粒華麗吸引，令人揀起嚟心猿意馬 。
喜獲贈送喺新推出嘅「Moon Festival Macaron Gift Box」（$220），七粒星星伴一個月亮，好有中秋傳統嘅七星伴月概念 ，啡色長型禮盒，透明圓形小窗，清晰可見嘅「七星伴月」，甚有種漆黑宇宙中閃亮星體嘅感覺 ；再者禮盒設計簡約、實而不華，令人一啲都唔會覺得老套，盒中內框跟馬卡龍呎吋一致，不會出現盪裂盪爛嘅情況。除「月亮」喺指定味道（Mango Passion Fruit）外，其餘7粒「星星」都可以自由選擇自己喜愛味道，實在喺個貼心安排，收到依份禮真喺窩心又甜蜜 。
既然喺法式月餅配越式咖啡，又要扮「高茶」，自然要似模似樣啦！老友送嚟嘅越式咖啡，成套架生齊晒，慢慢滴漏，跟足正宗落煉奶，加上老友嘅饋贈，當然加咗友情分，心裡覺得特別好飲。
馬卡龍月餅又如何呢？由下面純白色馬卡龍順時針起，分別喺：Jasmine（茉莉花茶）、Yuzu（柚子）、Poppy（罌粟花）、Lychee（荔枝）、Earl Grey（伯爵茶）、Banana Balsamic（香蕉葡萄醋）及Rose（玫瑰）。每個小圓餅做得手功都好細緻，外觀好完整，無崩無爛；上下兩層杏仁餅非常之鬆脆，因為我哋試過用刀切開，刀落餅碎，單單只想一開二，都無一件可以分得完整，可見脆得緊要 ，不過，入口煙韌富質感，滲出點點杏仁香氣 ；中間餡料好軟滑，唔同嘅味道又富個性，且突出，一食就嗒得出相關味道，但勁甜就要有心理準備喇，咁先喺法式甜點嘛，跟住就逐隻味講講我哋嘅感受。
Jasmine（茉莉花茶） 茉莉茶味嚟得清新，有種淡雅脫俗嘅感覺，估唔到茶味嘅馬卡龍可以做到有咁嘅效果，小弟推介之一，下次真想試埋烏龍茶味又喺點！
Yuzu（柚子）
柚子喺店內新出品，所以單張所見都仲未有依位新成員。柚子味樸素純香，帶點酸，又帶點甜，醒胃清新，加上賣相晌鮮黃色餅面上添一抹青綠條紋，特別養眼，另一值得推介之選。
Poppy（罌粟花）
因為罌粟花較少接觸，所以好想試試喺點，雖然罌粟花可以製鴉片，但少少罌粟籽唔會對人體有咩影響嘅。色澤鮮紅型格，底面沾滿罌粟籽，不過對口感唔會有咩特別，反而中間餡心帶出淡淡花香，意外地細味悠長。
Lychee（荔枝）
一向都好鍾意荔枝、龍眼依類嘅清甜味，所以見有荔枝馬卡龍就二話不說要選上。味道帶有蜜香清甜，荔枝味頗為突出，多食幾粒都唔怕上火吧！
Earl Grey（伯爵茶）
黃拼黑嘅外型，真喺睇唔出喺伯爵茶，不過一咬就輕易認出伯爵茶味，茉莉花茶馬卡龍已經好唔錯，伯爵茶亦都不俗，淡淡茶香，縈繞幽幽。
Banana Balsamic（香蕉葡萄醋）
入口有濃郁嘅香蕉味，但慢慢會滲出些微醋酸香，唔太強，唔會好搶，真喺幾有趣嘅配搭，葡萄醋這東西都喺晌上次Blue Butcher食飯中認識，香蕉襯葡萄醋，好值得一試嘅口味。
Rose（玫瑰）
送玫瑰花，女生當然好受落，如果送玫瑰味馬卡龍，相信一樣有唔錯效果。玫瑰香味好突出，花香馥郁，感覺唔會太假、太浮誇，加上淺粉紅色外觀，格外討少女歡喜。
眾多馬卡龍「星星」，都唔及個「月亮」觸目，除咗直徑有成8cm闊、3cm厚之外 ，黃底橙色漸變嘅效果，甚有八月十五金黃滿月嘅閃耀，真喺襯到絕。
Mango Passion Fruit（芒果熱情果）
雖然做到咁大個，外層表面依舊薄脆無失色，而且好有熱情果味，酸香有致 。餡心牛油忌廉嘅芒果味，豐厚清甜，幼滑滋味，夾埋熱情果嘅酸味，實在合拍得天衣無縫 ，如推出正規細個裝，相信又喺熱賣產品。（註：細個裝有熱情果味，但就未見有芒果味。）
盒上左下角一句法文「Le Festival de la Lune」，意思喺中秋節快樂，祝願各位唔單止中秋快樂，任何時刻都心存喜樂、心被恩感！
张贴
