入面嘅環境真係好靚，仲設有室外同室內嘅位置。如果天氣唔太熱，我就會推薦室外嘅位置，比較寧靜同舒服。
因為我哋覺得好肚餓，所以一嚟就叫兩份主食。芥末籽蜜糖焗美國頂級豬鞍架賣相已經夠晒精緻。
美國頂級豬鞍架屬於厚切，肉質非常鮮嫩而且帶有肉汁，配合芥末籽蜜糖醬真係幾好味。
而呢個豬鞍架嘅伴碟菜式都非常豐富，唔同顏色嘅蔬菜配搭繽紛，有黃色嘅粟米、橙色嘅甘筍、紅色嘅蕃茄、紫色嘅紅菜頭、綠色嘅西蘭花、啡色嘅新薯，再加上食用花作裝飾，真係美麗如一幅畫。
意大利煙豬肉卡邦尼意粉充滿濃濃嘅蛋黃香，煙豬肉嘅油脂非常甘香，整體味道都好香濃。
嚟呢度食飯，個個都必點佢哋嘅法式班戟，我哋就揀咗玉桂蘋果杏仁片焦糖忌廉班戟，仲加$10配埋雪糕。
法式班戟灑上甜甜嘅焦糖醬，仲有經烹煮過嘅蘋果肉同杏仁片，上面有微甜滑滑嘅忌廉，呢個組合簡直係絕配。
加配嘅雪糕係雲呢拿味，非常香滑，配埋法式班戟食真係非常夾。
