呢間係油麻地唔太起眼嘅正宗潮洲打冷菜館，真係要識搵先會搵到。餐廳格局普普通通，不過人流都幾多下，而且個陣滷味味勁香成間餐廳都聞到。
香辣田螺 $70
田螺隻隻都大粒，用竹簽挑粒肉出黎其實幾好玩。肉粒幾大粒，爽口，個味相對上比較辣不過好香
滷水雙拼 五花腩豬大腸 $100
滷水味道真係好香，色水都好靚，五花腩肥瘦均勻一層層，肥肉好有油香。豬大腸更加入味，大腸入面D脂肪唔會太厚身，食落唔騷，滷水個香鹹滲晒入去。
自選泡飯 蠔仔鹹蛋豬心 $68
蠔仔粒粒都飽滿，無腥臭味，豬心一片片爽口。另外加左個鹹蛋落個泡飯到，鹹鹹地幾香，個湯唔似有味精
五香牛腩飯 $55
牛腩半肥偏瘦，滷水滲晒入牛腩到好入味，D肉夠淋身又唔太油，個陣五香滷水味真係食完都會有陣回香
