炑八Taste (已結業)

又嚟到weekend,今日終於都唔係瞓到日上三竿喇,所以都未到下午茶時間,見到openrice有通知話大本型開咗炑八,所以就嗱嗱聲同阿肥過嚟試下喇。 雖然呢間店舖位於food court裡面,但地方都幾大,有好多枱所以暫時都唔洗同人爭位,所以我同阿肥都可以兩個人一齊出去揀咗食乜俾哂錢再搵位坐。見到呢間炑八taste同炑八燒烤好似都冇乜分別,每張枱都設有燒烤爐,一樣可以食韓燒,不過一起身就唔食啲咁熱氣嘅嘢啦,見到佢有全日定食嘅套餐,款款都好吸引咁。 我揀咗個6號：野菜烤牛肉蓋飯set～$47蚊,配前菜+清湯+飲品一杯(我揀咗檸檬茶,收銀小姐有講明係雀巢檸檬茶) 阿肥就揀咗個8號：特大烤牛肉蓋飯set～$58蚊,另外仲加$6蚊叫咗串魚糕串添 呢度嘅好處就係好似快餐咁,俾完錢之後已經可以去拎餐就有得食喇,前菜原來係泡菜嚟,夠辣"送"飯好滋味,仲有醃蘿蔔添,不過我就嫌酸咗啲,麻麻地喜歡。清湯係紫菜湯,不過好似唔太夠熱,希望餐廳會改善下呢個問題~至於個飯整體嘅味道都唔錯,不過就略嫌牛肉比較多筋,影響口感同滿意程度喇～不過有時粗粗地食一餐,過下條韓風引都唔錯