冬蔭公公 (已結業)

沙田收工，又要搵地方食飯，聽同事介紹，去港鐵站上蓋連城廣場冬蔭公公開餐。地點近港鐵站，非常方便，不過唔算好易搵，如果唔係經常出入沙田市中心的話，可能都要問一問人先搵到餐廳位置。大概夜晚七點鐘到達，唔使等位；但到八點左右離開，已經要等位喇。餐廳提供唔同主食、小食，亦有套餐揀，組合都幾多。本來想叫泰式軟殼蟹撈檬粉，可惜當晚軟殼蟹賣曬，所以改為豬頸肉撈檬粉。上餐速度都幾快，唔使點樣等。記得要用餐枱上面嘅撈檬汁，先至夠惹味。豬頸肉燒得比較香脆，但個人略嫌過咗少少，令到豬肉口感偏韌；不過勝在配料幾多，花生、蘿蔔絲等等，成個撈檬粉口感幾豐富。 小食叫咗個燒龍蝦丸，一串有四粒，外面香脆，內裏彈牙，加啲泰式辣汁，更加惹味可口。飲品係鹹青檸梳打，叫咗少冰，希望響美味同健康中間攞個平衡。 飲品鹹鹹酸酸，味道好醒神，炎炎夏日特別透心涼。