新城市廣場推出咗期間限定蠟筆小新市集，作為超級粉絲嘅我當然唔會錯過😆，行完之後就順便喺度搵餐廳食晚餐，並揀選咗位於三期嘅「微辣大排檔 」。
1
我哋想嚟呢間餐廳好耐，因為喺IG見環境好靚，嚟到發現真係每一個角落都係打卡位📸，裝修花咗好多心機呢。不過麻雀餐枱靚係靚，但就坐得唔係好舒服，因為好易頂腳🀄️。
大排檔伙記態度唔錯👍，雖然忙碌，但仍樂意主動介紹菜式。佢推介我哋試吓微辣十大必食，而且仲講到佢哋雲集咗五間著名港澳米芝蓮品牌嘅美食🇭🇰🇲🇴。
米酒雞($249)，呢個係招牌菜，大大個「雞」鍋送到面前🐔，憤怒鳥造型嘅煲蓋好可愛啊。開蓋後店員會倒入米酒，然後點火燒燒佢🔥，呢個時候記住要準備相機啊。當火熄咗後，就可以剪雞，將佢肢解。
米酒雞帶微微酒香🍶，兼且用咗好多蒜頭同蔥調味。呢隻雞肥美好肉，同埋炆到好入味，雞肉勁易離骨，肉質軟腍唔嚡。雖然佢無富貴版嘅鮑魚花膠冬菇，不過原味都已經幾正。
懷舊蟹膏蝦多士($129)，雖然佢話懷舊，但我反而覺得係新派，哈哈。🍞蝦多士一客有四件，全件炸至金黃酥脆；而中間蝦膠層則好彈牙🍤。小食同時仲配有蟹膏蟹籽🦀，即係好似日式甲羅燒嗰種，刮一啖放上多士一齊食，可算係鮮上加鮮。
發記大香腸($79)，🌭大香腸本身吊喺架上，好盞鬼，但食嘅時候都係要拆落嚟剪開。香腸好大條，可以切到成十粒有多。香腸外皮微脆少硬，味道濃郁，鹹得嚟又辣辣哋🌶，如果沾埋芥辣就更重口味，不過我鍾意。
2
椒絲腐乳通菜($99)，💚炒通菜係相對大路嘅菜式，不過佢整得幾惹味。通菜爽脆無渣，而且索滿椒絲腐乳汁，鹹度同辣度得宜。雖然碟菜係貴啲，但份量都比平日多。
總括嚟講，微辣大排檔嘅菜式別具特色🥢，定價係偏高，不過一試無妨嘅，而且佢哋將傳統港澳風味重新包裝，令年輕一代都有興趣認識同品嚐，做到「港澳飲食文化輸出」嘅理念。
3
1
2
