冬蔭公公 (已結業)

 沙田市中心幾個大型商場連埋一齊，名店多，餐廳都好多。如果向新城市廣場食飯，會比較貴少少；如果行返近小小火車站，搭電梯上連城廣場，就有唔少比較親民啲嘅選擇。今晚就去咗冬蔭公公開餐。向來都鍾意食撈檬粉，所以今日都唔例外，繼續點撈檬。配菜揀咗豬扒，因為豬扒撈檬粉係公公推介。豬扒鬆軟，冇話炸到好乾，肉質彈牙，份量亦都足夠，配撈檬汁享用，更加醒神開胃。燒魷魚鬚燒得幾香，竟然有啲鹵水汁嘅感覺，當然最正宗嘅梗係配返跟埋嘅泰式汁 ，先至享用到真正泰式滋味。肉質比較實淨，整體感覺不過不失。飲品揀咗芒果乳酸，芒果肉已經打咗入飲品之中，所以食唔到芒果肉，但會品嚐到芒果香甜同埋乳酸清新。