永順食店 (已結業)

好耐無食永順，事關條街真係好難泊車，同埋成日塞車，所以都好少揸車入去。今日心血來潮好想食，就即刻仆去，咁啱門口有吉位，人又唔洗等位，完美！兩個人嗌咗一份沙嗲牛一丁，沙嗲牛蟹王麵同一份油占多，油占多就唔夠多餡，包皮唔夠脆。沙嗲牛麵就例牌要等15分鐘左右，所以想速食，唔等得同無耐性嘅人就唔好考慮食永順喇！蟹王麵同出前一丁分別在於蟹王麵要加$2，麵身無咁硬，但就好索味索汁，索晒啲沙嗲汁就好好食。沙嗲牛就唔洗多介紹，食過就知係香同濃，牛肉新鮮，絕對唔係一般茶餐廳食到嘅牛肉！