鋼管廠五區小郡肝串串香 (已結業)

一點鐘係銅鑼灣食飯有時真係好難，今日行咗好幾間餐廳都要排隊，甚至沙嗲王都唔例外。既然上到沙嗲王又唔想等位，惟有喺黃金廣場繼續覓食。9樓呢間串串香應該係新開嘅，裡面有好多位，侍應又話唔打邊爐都有其他麵食，所以諗住都一試無妨。麵食選擇唔多，有四款，而其中只有一款係唔辣嘅 －就係呢個番茄牛腩麵($68)。午餐配一款小食，小食一樣有四款，不過今日只係淨返青瓜，其他已經冇曬嚕～另外新推出期間贈送洛神花茶，同埋免加一。拍青瓜嘅醬汁亦有點奇怪，唔知係唔係醬汁因為未攪勻嘅源於，食落有啲一粒粒嘅調味料依附係青瓜上面。番茄牛腩麵嘅湯底濃郁，但係偏酸。牛腩有好多舊，有牛味，亦都好腍。可惜敗筆係麵條，麵條係圓嘅幼身中式麵，不過一咬落去竟然係由麵粉嘅感覺，完全無麵條應有嘅煙靭口感，大失所望。我諗下次再嚟都只係會食串串，麵食就不必了。