發記甜品 (已結業)

今日同幾位朋友食完晚飯傾得興起唔捨得走，所以我地就轉地方去食湯水，在尖沙咀搵了好幾間，最後選了最近我們的呢間發記。可能時間還早，所以入面仲有位，我地都不用等就可以入去。這裡地方唔係好大，裝修簡潔，有幾張枱，坐埋我地又滿座了。真好彩！我地左睇睇右睇睇，都唔知想食乜，後來揀左好耐先揀好想食的甜品！第一個朋友就揀左個香草綠荳沙加芋圓，綠荳沙太甜，芋圓唔夠煙靱，以為唔同顏色有唔同味道，點知係完全一樣味！我就叫左個百合雪耳燉香梨，糖水又係好甜，百合同雪耳都煲到好腍，但我覺得佢似係滾既糖水多過係燉囉。跟著又係我朋友既花奶芋圓涼粉雲尼拿雪糕，芋圓都係同樣問題，唔煙靱，涼粉同雪糕都冇咩特別。另一朋友就叫左個紅荳黑糖芋圓涼粉，涼粉冇乜特別，紅荳太腍，食唔到一粒粒，紅荳又係太甜，芋圓一樣唔煙靱。以前發記啲甜品都幾好食的，但近年真係越黎越差，希望佢快啲作出改善，如果唔係逐漸會俾人淘汰。