糖宮甜品專門店 (積信街)

营业中

休息中

近年新式甜品鋪開到區區都有，連大圍都唔例外。今次我哋就嚟咗呢間由一衆年青猛男 打理嘅糖宮甜品專門店。又睇下呢班年青人做成點啦!餐廳以白色磚做主題，做到有種warm house 既感覺，睇得出有花心思去裝修設計。門口出面有張枱，有青年木結他手jam jam歌。玻璃窗上用粉筆寫上了菜色，畫了公仔圖案。叫左一款玉桂蘋果香蕉酥皮卷配綠茶雪糕 呢款甜品呢好少喺出面見到，幾有特色。食落啲脆皮真係好鬆脆好薄，有啲似拿破崙嗰隻質地。入面係熟咗嘅香蕉，加埋啲甜醬同埋啲玉桂香，食落個口感好新鮮，好味道。我覺得呢個甜品做法都幾考功夫，要焗到個皮啱啱好又唔燶又唔爛應該唔易整。配埋 綠茶雪糕食仲有啲冰火嘅感覺添。 另外叫左一款榴槤爺爺。 爺爺嘅意思原來係椰皇。呢款榴槤雪糕做得好出色，好重榴槤味之餘食落亦都好好軟熟，又似雪糕又似榴槤既口感。椰皇入邊加有榴槤肉，小丸子仲有好多西米溝埋做咗一款甜品。甜品好足料，榴槤 好香好濃，小丸子好彈牙，口感十足。最重要係佢啲椰肉係好易刮出嚟，食完非常滿足。埋單$110,整體嚟講,呢班年青猛男做到呢個水準，係幾出色，要再接再厲呀。