地點都算易搵, 出左港鐵行幾分鐘就搵到!
店內一貫深木色裝飾, 配以紅紅燈籠, 幾古色古香FEEL
設有醬料區, 自行出去"混醬"
火鍋食材夠多選擇, 台灣獨有食材呢度都有, 想食正宗台式火鍋無難度
幾款特色養生湯底比你選擇, 仲有雙拼
選擇麻辣鍋拼寧神養心鍋 (以較高價錢湯底收費)
麻辣湯底以多種香料及藥材調製, 配以鴨血及凍豆腐, 辣度由大中少小可選擇)
呢度嘅麻辣湯底係我食過咁多間台式火鍋當中最岩口味, 湯底夠香之餘辣度又岩岩好, 內裏配鴨血同凍豆腐, 兩者同麻辣係好岩數, 鴨血紮實得黎入口夠嫩滑, 唔會一夾即散; 凍豆腐索入湯汁, 一咬即爆汁, 絶配!
驚喜仲有送你一客追加鴨血(腰果眼MODE出現)!!
寧神養心鍋則以川芎, 白芷, 天麻, 當歸, 鮮鷄及魚頭調製, 好香藥材味, 有半隻竹絲鷄及魚頭, 材料非常豐富, 未火鍋前先飲碗靚湯先, 鮮甜味美, 飲完感覺舒服!
LIKE佢地facbook同打卡, 即場送你咸檸七, 咁著數當然咪執輸啦
火鍋時間正式開始:
嘉美農場鷄肉 ($108) - 鮮嫩無骨鷄肉, 去埋皮等你食得健康D!
肉質幾滑, 鷄味比較出!
即炸脆響鈴 ($68) - 一條份量唔太大, 唔驚食一條太油膩, 放落湯幾秒就食得, 幾重豆味!
墨魚丸 ($40/半份) - 除返一粒要成$10, 好在口感確係彈牙, 食到墨魚粒, 真材實料呢!
自家製極品水餃 ($42/半份) 及 自家製韮菜餃 ($42/半份)
水餃皮薄餡靚, 有原隻鮮蝦, 豬肉及木耳絲, 食起黎幾重口感及味道, 果然係極品!
而韮菜餃夠飽滿, 皮較水餃為厚, 咬落有滿滿韮菜味, 菜同肉嘅比例亦都恰當!
雜錦蔬菜盤 ($68) - 一盤有幾款菜 (娃娃菜, 小棠菜, 生菜等)及菇, 粟米夠甜, 娃娃菜烚完仲甜!
寬粉條 ($38) - 入口夠滑, 口感煙韌, 烚至透明色就食得, 每次黎都必叫!
怕熱氣?! 唔駛怕喎, 送上甜品, 之前食過沙冰, 今次係雪糕球, 冰火二重奏, 掂晒!
