肥姐小食店

营业中

休息中

今日去左柏裕商業中心換禮物，換完落樓又想起肥姐小食店在附近，近近地點都去幫襯下，去到見人龍真係幾長，三十人正在排隊，猶豫左一陣都係照排鬼叫我真係好想食咩，條隊成日好長經常阻礙到隔離舖和行人，見有阿姐企出來維持秩序，大家都好自律跟實隊形，如果再多啲人排隊真係難以想像咩境況，始終等候地方有限。排隊等候時間好快，不消八分鐘就輪到我效率好高。今次點了大皇牌(墨魚大生腸火雞腎)，醬料方面間店唔會吝嗇，你喜歡就落多啲俾你，完全滿足你口味，甜醬和芥辣醬混埋一起真係幾好味，今次芥辣落重手左食到我眼淚流，下次都係唔駛叫佢額外多醬。火雞腎咬落爽口好好味，墨魚和大生腸都係幾軟身好易咬，但兩者口感味道比較相似，下次點紅腸取代墨魚或大生腸其一，三串不同口感味道食得會更滿足。難得肥姐小食仍然保持水準，夠凍夠爽同埋俾我感覺夠乾淨，所以每次經過總會到來幫襯。