ME.N.U (已結業)

中午時間嘅淘大，人流唔少但係幾乎間間都唔滿，呢間算多人但都好快有位。遠睇個名無乜特別不過行近D就發現響N同U前面加咗一點變成 “me & you”又幾有趣，路線走西日式，以快餐形式經營，裝修格局亦似快餐店，叫完食物會俾個牌放響檯面等佢送食物嚟，好處係食客唔使自已攞坐響度等，唔好處係時間可能會耐咗，好多人都等得唔耐煩，見到D侍應又頭岳岳周圍揾個牌都替佢辛苦。叫咗3個餐：咖喱牛腩石頭飯、芝士火腿意粉同雞肉pizza（半個），全部有餐飲，加$7有酥皮海鮮湯。咖喱牛腩石頭飯嚟到仲好熱，牛腩炆得夠淋，咖喱幾好味，芝士火腿意粉味道一般，意粉夠爽口，個pizza幾細餡料又唔多但係餅底夠薄又夠脆。酥皮海鮮湯有水準，比美心快餐好好多，個忌廉湯以比好多餐廳好。餐飲方面咖啡好普通，奶茶同檸茶都正因為茶味夠又唔會好濃。以快餐價錢食到餐廳水準，可以話好抵食。