芝加哥串燒酒場 (太和中心)

疫情下少左出街食飯，上星期同老公七週年結婚記念，就出去拍下拖食個飯，揀左晌太和的芝加哥串燒酒場 Dragon BBQ Bar，酒吧格局有酒飲、有串燒，肚餓仲有飯可以選擇，店內牆上仲有好多唔同版本既日本響。入去到真係好Relax，好大部電視可以睇波，夜晚過黎睇波真係好有氣氛，酒類選擇好多，老公點左杯威士忌加可樂，平時好少飲酒既我都要點返杯1664啤酒，食串燒配啤酒好正。串燒方面都好多選擇，價錢都好大眾化，叫左燒蠔、燒鮑魚、甲羅燒、豬大腸、牛仔骨、牛舌、鵝肝、雞皮、雞軟骨、茄子、粟米，仲加多個鰻魚飯，我地唔多好蔥所以全走蔥，我最鍾意甲羅燒，好有蟹肉香味餸飯一流，燒鮑魚香口得黎唔會好韌，最特別原來鵝肝都可以做串燒，真係第一次咁食法，外脆內軟好香肝味入口即溶，鰻魚燒得香脆配上鰻魚汁和白飯一流。 下次都想試佢啲Frozen Beer，見隔離枱有叫啲泡泡好似軟雪糕咁，唔知味道係點呢？