啤啤Bear韓國包車 (已結業)

尖沙咀一間非常熱鬧，而且氣氛一流嘅韓國餐廳，餐廳佈置極有心思，一搭電梯上到餐廳嘅樓層就比一隻大啤啤吸引住， 十分醒神矚目。而且餐廳嘅色彩同埋燈光嘅配合，令人好似置身喺韓國嘅餐廳同埋街頭。雖然餐廳位於尖沙咀嘅地段，但係食物價錢非常合理，有唔同嘅地道韓式食物可以選擇。當日點左鐵板芝士泡菜炒五花肉，呢款菜式配上鐵板同埋明火上枱，芝士喺幾分鐘之後就已經燒到溶晒，撈埋五花肉同埋泡菜一齊食，味道簡直一流。😋而且芝士都分量十足，有拉絲嘅效果。嚟韓國餐廳點可以唔點炸雞呢？酸忌廉醬配炸雞，醬汁可以中和炸雞嘅油膩感，令人食多幾件都毫無負擔。呢度啲炸雞可以話係非常出色，炸完之後一啲都唔乾唔柴，仲保留左雞件嘅肉汁。而且份量十分多，一份已經有十件八件左右，兩個人完全食唔晒。加多個蕃茄韓式海鮮湯配中華麵🥘🍜，呢個中華面驚喜十足，配有大量海鮮而且大件，中華麵索晒啲韓式辣湯汁，令人食指大動。👍🏻配合食物同埋氣氛，真係唔可以唔飲返杯酒。餐廳提供唔同嘅有酒精飲品，啤酒以至Cocktail都有，大家都可以點返杯同朋友一齊暢飲🍻🍸🥃睇返餐牌，五花肉同埋飲品都有無限追加同埋暢飲嘅優惠，價錢亦都唔算貴。