門面以紋理做，簡簡單單就係冰室俾人嘅感覺。
內裡都係以木為主，吊燈，作為冰室有咁嘅裝潢已經好足夠，較為新式的冰室設計。
廚房前面的牆上有好多iron man，少少裝飾幾特別。當然我自己係佢粉絲🤣所以都幾鐘意。
座位寬敞，冇記錯係6人座位，當然非繁忙時間2個人坐都可以。
鮑片火腿湯通粉+3.6北海道牛乳炒蛋配奶占脆豬（$30+$5改脆豬）
鮑片火腿湯通粉，用素鮑片，加上火腿，少許雞湯做湯底，配合通粉而成。
味道偏淡，通粉較軟身，我個人較喜歡有咬口多啲。整體就不過不失。
奶占脆豬，好味
果占夠多，煉奶剛好，脆豬真係熱熱地脆的。眾所周知，有啲茶記脆豬係普通麵包冇再焗過，一食就知廚房有冇用心去煮。呢間係有再焗過個包，煉奶同果占味道好出。至於3.6北海道牛乳炒蛋就蛋味唔算重，食到牛奶味，入面應該係蘑菇汁。味道偏淡，我覺得可以多啲蛋味同鹽，有進步空間。
咸牛肉玉子燒配炸帶子，意粉（組合係自己揀）$55
炸帶子好食，唔算好鮮味，但炸得剛好，外面炸粉脆又唔多。
咸牛肉玉子燒，跟外面食的玉子燒唔同，佢係炒蛋入面有咸牛肉，唔係外面個種長方形玉子燒。咸牛肉好食，唔會過鹹，加上外面炒蛋味較淡。
整碟較為遜色係意粉，意粉冇咩味道，應該要多啲鹽或者用一啲蒜蓉汁提升味道。帶子，玉子燒的醬汁似日式甜醬油，幾好食。
黑松露芝士焗雜菌西蘭花$48
簡單講，呢道菜係正嘅
唯一小暇疵係西蘭花太多水，唔夠入味，唔夠鹹。芝士足夠，有拉絲效果，菇有黑椒調味，夠味。
飲品冇咩太特別，叫左杯凍鮮奶同熱柚子蜜。
柚子蜜味道略淡，凍鮮奶味道都唔錯。
以冰室黎講 ，水準算中上至中，環境都舒適，唔算好嘈。座位闊，乾淨。食物略淡，但如果你追求健康就不錯嘅選擇。價錢就同外面嘅餐廳差唔多價，正正常常。
因為擺唔到咁多張相，所以餐牌冇放上黎，重點應該放係食物嘛🙂
