有得餃 (已搬遷) 新店位置

建業街係食街黎，兩邊馬路全部食肆，喺泗記食完碗蒸飯，再行幾步就係有得餃，入去食碗餃當round 2，仲有世界盃睇添。見到好多客嗌麵食，都有啲心郁，但係上半場已經食咗個飯，食唔落啦，於是點咗8粒芹菜豬肉餃，估唔到淨餃唔只冇麵，係連湯都冇。食落餃皮略厚，餡料算足，不過芹香蓋過哂肉味喇，其中一兩隻仲食到有類似碎骨嘅異物，真係好一般。食食吓發現好多人叫醉雞翼，唔爭在叫埋，食淨打包啫。呢隻雞翼就全晚最佳球員喇，37蚊8隻，數量上已經好抵叫，諗住數量多即係好細隻？結果好大隻。諗住大隻即係唔入味？結果又好入味、好有酒香。埋單時睇到牆上剪報，原來呢間野仲投咗美食車黎做，真係估佢唔到。