Mr. Crab by The Captain's House (已結業)

Mr crab嘅海鮮袋真係食極都唔會厭，呢次我哋又再嚟食一次，佢哋嘅二人餐CP值好高，有齊哂主菜或shake shake海鮮袋、湯、appetizer、pasta/risotto同2杯house wine。嚟得呢度一定要食shake shake海鮮袋，佢哋有多款海鮮可以揀，包括咗：海蝦、馬尼拉蜆、小墨魚仔、翡翠螺、藍青口、原隻去頭魷魚等，仲有幾款可以加錢嘅高級海鮮。而醬汁亦有三款可以揀，呢次我哋都係揀返Mix and Match ，佢有齊三種醬汁嘅味道，酸酸辣辣，非常惹味。呢次揀咗馬尼拉蜆、海蜆、藍青口，佢哋嘅海鮮好鮮甜，肉厚飽滿，又無沙，吸收埋惹味嘅醬汁，可以突出海鮮嘅鮮甜味。除咗有海鮮之外，仲有原個薯仔、清甜嘅粟米同埋脆皮香腸。龍蝦湯：湯身較濃淍，龍蝦嘅鮮味十足，配埋香草包一齊食就啱哂。Crab Cake ：煎到金黃嘅蟹肉餅，入口酥脆，蟹肉鮮甜又多汁，加上秘製醬汁仲更加好味。黑松露燒烤菇意大利燴飯：離遠都經已聞到好濃郁嘅黑松露香味，仲配埋兩大塊經過香烤嘅大菇，食落有多重菇菌嘅香味，而燴飯嘅口感好creamy，同黑松露味道好夾。