一嚟嘅前菜有食嘅順序，首先入食咗個蕃茄水雲、然後就食個螢光魷魚，最後先至食黑梅貝
水雲酸酸地，幾開胃，除咗水雲之外入邊仲有啲菇👍螢光魷魚食落個口感幾天然，唔會覺得膠膠地，唔知大家明唔明咩係膠膠地嘅魷魚😂😂 佢完全冇呢個問題，所以幾眼前一亮。黑梅貝已經醃到入味，軟軟糯糯咁
白松露鯛魚刺身，我一開頭唔記得咗嗰啲係白松露，以為係鹽。但一入口就已經感覺到好強烈嘅松露香味，兩者配搭得好正，原來鯛魚刺身都有依種食法。
壽司嚟講要先食過池魚魚腩，再食個碟魚。因為碟魚佢用火燒香左，令到啲油脂滲咗出嚟，而且分布更加平均，真係食落口唔捨得吞落肚。
鐵板燒方面，佢嘅龍蝦用咗龍蝦膏去炒，好香，我覺得龍蝦配埋佢下面嘅組一齊食又另外一番風味，調和左令到個味度更加清新
帆立貝係刺身方面，燒起上嚟唔會過熟，一啖記食到熟嘅口感，亦都食到刺身嘅口感
肉嚟講我哋揀咗一個薄燒牛一個厚切。師傅會事先問咗我哋個熟度。厚切牛嘅牛味就絕對濃厚啲，但薄燒牛佢配埋啲蔥又係另外一種風味。我哋一人揀一款，所以兩款都試過晒，好滿足。
炒飯上面落咗啲炸過嘅櫻花蝦，廚師建議我哋撈勻咗先食，咁我一啖飯都會食到脆卜卜嘅櫻花蝦
魚湯比想像中出色，佢有好強烈嘅魚味，但冇魚腥味，一碗落肚份量啱啱好
甜品係蜜豆抹茶布甸。依個抹茶布甸係我食過最好食嘅，因為佢有好濃嘅抹茶味，但係冇個茶嘅澀味或者苦味喺度。另外佢都冇抹茶嘅嗰種草腥味，所以我好鍾意。
