金蘋果餐廳 (已結業)

媽咪一向唔鍾意我亂花錢，情願我儲多個錢投資買樓，所以今個母親節，我特別揀左一間在娘家附近的平民扒房，食餐勁的！母親節晚飯，理論上間間食肆都排長龍逼滿人，唯獨呢間在地牢的金蘋果，成五千呎咁大都只係得幾圍枱，唔嘈、唔逼、亦唔趕，仲連加一都唔收，價錢同平時一模一樣！一人一個鐵板大餐︰老公叫左個最“貴”的西冷牛扒，蒸氣騰騰，呢個幾好食，塊扒勁大塊，抵食！我就叫牛扒配龍脷柳，牛扒幾好，龍脷柳就鹹得滯，我亦嫌佢太燶，個日式燒汁幾特別，有薑味，如果唔鍾意薑就唔好叫呢款汁啦！媽咪同阿爸都係揀左牛扒配漢堡扒，配芝士汁好吸引！下次我都要試芝士汁～漢堡扒比較適合老人家，類似牛肉餅咁稔稔地易入口～細佬仲叫左個牛扒＋蜜汁豬頸肉配日式燒汁，試過佢D豬頸肉，原來幾好食！好過龍脷柳好多，下次我都會試呢款～六十幾蚊一個鐵板，有湯、厚切西多、跟飯／意粉／薯菜(份量幾多架)、包埋熱飲同啫喱，真係好抵好抵！咁當然，將貨就價，食物質素好難話要求好好味，但如果你想平平地食餐豐富晚飯，仲要傾到偈，呢度唔駛訂枱都必定滿足到你呢D要求囉！